LAWNGLIEN KHA AW!

LAWNGLIEN KHA

✍️VL THUAMA

Naupang chite kan nilai khan sikula a Lawnglien chanchin kan inchuka;an hawi khawp el,A lim kha a en an hawiin mit a suk tlai hle,Chu lawng lien chu damlaini hin vawikhat bêk hmu ve lang aw! tiin kan ngaituo vawng vawng ela,Kan sir pa hril dân lem chun “A sunga hin thil chi tamtak a um a,Khelmuol dâm, Restaurant le thil chi tamtak khawm a um ani thu a hrila,” Naupang hai chun ngai inhawi kan ti khawp el.

Nikhat chu leh,Tlasik tieng a hung hnai ta a;Tui hnâr khawm a chât deu ta leiin tuikhur tieng insil a rem ta naw a,Tuiruong hi anhawi lem bawk lei hin Tuiruong tieng insil dingin kan tlan suk tawla,Chuonga tuiruonga kan insillai chun nidang zân danga kan i hriet ngai dêr naw ri kan hriet ta a,Chu thil ri chu amak khawp el,An ri chêlchûl ela;Keini laia ṭhenkhat lem chun Tawtawrâwt ri ning atih an ti hiela,Hmu kan nuom bawk si,Kan ṭi bawk si,Um ding hlak chun a hung kai pei bawk si,Tlân kai tawp ding hlak chun mit ngeia hmu a khuo le vêng hai kuoma hril kan nuom bawk si,Thi le thi dam le dam tiin kan nghâk tawp a,
Karei leh! A kawina a chun a lu a hung dâwk vur el ta a,Karei karei! Tui fâwn in phu zuoi zuoi chun vakam chu a sawk ri bawr bawr ela,A mawng tieng pang a lan lang chieng naw lei khan iem ani ding ti khawm kan hriet el chuong nawh a,Awi karei! A hung inlang vawng chu kan chinlaia kan hmuchâk le kan suongtuo hlak Lawnglien kha alo ni zing el,A van hawi ngei de aw!

A hung na tuifâwn chu a vakam tieng a hung inhnâwk phei hum huma,Tui khawm chu a so bet but el anih:
Chu lawng chu an sâng khawp el,A sâwng sâwngin a um a,sâwng thum zeta in sang anih,A chung a chun Flag tamtak hi an zar a,A bathler achun Sipai le Doctor ni awm tak hai chu an in lawn kal nawk nawk a,Hmu an in hawi ngei,

Chuonganga lawnglien chu ka vawikhat hmuna ani lei khan inhawi ka ti êm êm ela,Tuisuoriet vakam a khawsa ni hin kan hriet el ani chu tie…

KHA LAWNGLIEN🛳️ TAK KHA AW!
THEINGHIL NI UM TA NGAI NAW NIH…