MUVANLAI LEH GINGTU NUN

CHUNGMUVANLAI LEH GINGTU NUN

VL Thuama


Amasapen in zik thiem leh gên thiem ka hih loh ziekin a sim a hak mai thei ahi,mahvang tawmngaih suoha ei na sim tum sak ham dingin simtu te cheng cheng na vek un ka hung ngen ahi.

Chungmuvanlai hi vacha laka mi gen minthang pawl khat ahi a,A helo ding sâm hi le a um uh ka gingcha puoi;Ze muvanlai chun bang ei sinsak em,muvanlaia pat banga zil ding ineih uh ana sim hi tiu leh.

👇🏻
👉Muvanlai hi vacha laka lien pâwl ahia,a lien pen vâng a hi puoi,Ze muvanlai chu chung thangvan vanlaizawl a tha zâp liulieu in a leng hem hem mai seka,A len dân hi nuom huoi tak mai ahih,Nungak tangval kingaih na kala nungak nu a him tangvalpa a him khawdang leh mun chuom a a um tieng uleh kingaihna thusim lasim in “Chungmuvanlai bang lêngthiem leng na lenna vangkhawpi ah lautha bêkin len ka nuom ngei ie” tin kingaihna lasim ana sa ham ham sek ui,Ahih, Sûn nisa sat lai taka thinglim nuoi bela mun lim ibelh laia vanthamzawla van boruok thieng silsel nuoia chungmuvanlai a hung lênga “Kawkawkawlêk kawlêk”tia a hung hâm chu lunghel um tak mai ahih.

START

Muvanlai chun thutiem aneih masangin a thil ki tiem kam na ding chu a na en lâwk masa zet seka,Pha tâwka a ngaih nungin ze ki tiemna hun chu amang choh sek ahi,Muvanlai pi chun Muvanlai chal tawh a kikal ua thutiem aneih ding u hin amah hêltu muvanlai chal chu a dinmun bang ahim,a det zo tak tak nâm tin a en masa phat sek ahi,Mawlh kang a him khat chu a mûkin tawk kaiin a mah hêltu muvanlai tangvâl chu tawh a lêng kai ua,Vanlaizâwla pat chun a hung khie a; Ze mawlh chu nuoi a tun masanga muvanlai tangvâl chun a mat man loh leh tangval mat tak lo,inkuon enkawl zo lo ding ahih ziekin ki chênpih tâka a guot kha puoi.

👉 Tulai Nungâk tangvâl te hin vâng zie nu/zie pa hin ka insung uh siemtûp thei inah ie tia malam thîllâwkna nei hiel lovin i mei khâk u leh i sît khâk khâk uh i nei mai sek ziek uhin inkuon tamtak a buoi lawh ua,Nu le pa tam zaw chun insung a siemtûp zo lo lawh sek ui,Muvanlai bangin Thutiem na neih masangin bêl chien masa phat sekin.

Muvanlai hin Bu a sep ding leh kawl lêk sangtak mai ah kawl sie tak mai kuomah kal viel kum viel theih loh na ding mun kâwl sie laka bu a na siem sek ua,A hih loh lele thingkung sâng tak mai kuo pa kal theih loh na ding tâwka sânga a siem sek ahi,Ze sa sa a muvanlai bu la thei haw chu pasalpha mi gen minthang haw a hi sek ui,A bu la guo haw chu kichakna bei hielin a bawh zawt zawt sek a,A bawl fuh lo haw dinga chu thân khuk panga ding bang ahi a ti sek ui,

👉 Ei uh Lalpa Isu Krista nungzuitu te leh a chate hin le thêmpa setan lâk phâk loh na dinga sângin Ginna a bu siem hi tiu,Suol setanin lâk tei guon pan la sek mahleh hâng san takin do ngam hi tiu.

Muvanlai tûi chu a keu tieng leh a note chu lêng thei tanau maw tih a hin a note chu a tha chungah kawih in sâng tak maia a len toh pih a,Lungsiet na neilo bang maiin a chate lêng theih vak deih ba ziekin a tha a pat chun a lek tha a,A note chu a kiek tieng uleh a thau chu zâp in lên a zil sek ua,A chal chun tuol a nataka a kiek ding chu phal lo in leh a zi tawh a ki tiem masang ua vanlaizawla pata mawlhkang kie a na mat kha mang pha chuomin a kin theih lam a lêng suk in a nuoiah a thâ’n ana dawm sek hi,Khutia a bâwl a bâwl nung u chun lên a hung thiem ua,hat tak takin a lêng thei sek ui.

👉 Haksatna leh lungkhamna na tuok tieng leh Pathien na sim mawh sek maw?,Na lampi hawh ah melma na do zawh theih na dinga lungsietna zâla sinsakna chang na hi zawi tih he zing zâwn,Thununna lawh lo chu Zâu nau a hi zaw sek hi,Pathien cha diktak na hih chun Thununna a him Masanga na kal suon zelna dinga hun dotu te na neh theihna dinga phachuom training piek na hi zawi tih na lungthimin vawp zingin.


Muvanlai chun malam thillâwkna hawih tak mai leh ngaihtuohna dettak mai nei ahia,Ngaihtuohna nei masa zet lo in nêk le châk le a hawl ngei puou hi,A nêk hawl dan hi mak tak mai ahih,Khuoi bu lien tak tak mai haw chu a bawh zâk ua,A no ke haw chu a luok sek ui,A bawh kiek zawh loh ua a tâng ngei ngei uleh khuoi haw chun a ne zaw sêk ui.

👉 Ngaihtuohna phâ tak leh malam thîl lâwkna nei masa zet in thupûkna siem choh sêkin.

Muvanlai chu thangvânsânga khawsa sek ahi i ti ta kha, Vân boruok thil tu te chun vânlaizâwl a khun huih nasatak in a nung sek in Ze huih chu nuoi lam a huih nun sek sângin a nasa zawi a tiu,Ze huihpi nasatak kâl chun muvanlai chu lêng in ze huih chu hât ten mahleh lau lo hielin a lên ngaiin a lêngin,A lên sâng deuh deuh a ( huih chun a mit a mut sak ziek hi ngei din ka gingchai) a mit thi a pulh tam deuh deuh a,A mit thi a kiek tam chêng leh a khaw muh a fieh deuh deuh sek a,Vanthamzâwl a pat in nuoia nahthu nuoia nahthu gûl vâk le a mu thei sek ahi.

👉 Ze khawvel huihpi hin ei mût nawk nawk sekin ei gên sie ding leh ei musit tu huihpi mahleh nung vaih mai lovin malam zuon in chieh zêl in,Lal nasep na ahin i chieh sâu deuh deuh a ei gên sie ding a tam deuh deuh ua,Mitthi luon na di a tam deuh deuh sek ahi,mahvâng mit thi a vat tam cheng leh Krista a i khaw muh chu a chien zaw sêma,I mit chu a fieh deuh deuh zaw sek a hi.
Ze khawvêl gên siet musitna huihpi haw hi Krista a i mit suk vâk deuh deuh tu a hi zaw sek ui,Lau lo in chieh zêl hi tiu,Kahna gam khel chan chieh ding te i hi ngâl ua.

Muvanlai chu kum 40 ahih nung a a thih nailoh le le têk tak ahih tâk ziekin ki siem thak kîtna (rebirth) anei sek ua,Ze tieng chu leh a thâ haw a pulh suok kei a,A tin haw,a mûk haw chu a tawng sik sek a;a dang a hung no thak kît sek a hi,Ze tieng chuleh muvanlai chu natna na satak thuokin a um seka,Nêk le châk le hawl peih lovin a um sek ziekin Muvanlai dang haw chun a nêk ding a dâwn ding a hâwl kêp sek ui,A mul leh a tin chu a kek kim kei na ding chun tha nga veng vawng ngâk a ngai sek ahi,A mul haw,A tin haw a hung thak kit phet chun a teirawl lai hinkhuo bang khan a lêng viel vut vut thei kit sek hi.


👉 Nang le kei hi le i têk nungin ki suk teirâwl thak thei ta lo mahleng;Thagau lam hinkhuo avâng nichenga Siemthak ngai zêl i hiu,Bang hihen la kuo hileh Siem thak a um ding chun haksatna natna thawk angai ahi tih hetngilh loh a phai,Muvanlai hi le siemthaka a um ding hin bang chan pheta na a thuok dem tih ngaihtuoh in,Thik haw leh Dangkaguo haw le siemthaka a um ding u chun mei a hâl a ngai sek uh ahi kha;Nang le kei hi le Siemthak a i um ding un nuom tak leh beihlam taka vâk ki Siemthak mai ding in ki ngaihtuoh kîn.


Muvanlai banga siemthaka umin,Ginna a thazâkin vanlaizawla lêng viel inla,Na hinkhuo chu Thêmpa Diebol lâk phâk lohna dinga bu sep inla,Na chieh viel leh na sep ding mabâk a chun lunggêl thûk tak leh thîllâwkna nei masa phat inla;Haksatna leh lungkhamna mun na tun tieng leh Lalpa a kipak zêl zâwn la, Gên sietna leh musitna huihpi in hung mut sekin na mit thi chu tui nâk guolin luong sek mahleh Krista a na mit su vâk tu ahi tih he zingin.

VL Thuama